بوابة الساعة الإخبارية رئيس مجلس الإدارة محسن سرحان
بقلم: اللواء أحمد سلامة
أسأل الله أن ينفع بما أكتب، ويجعله في ميزان حسناتي وحسنات من يقرأ. 🇪🇬🛡️
لكل من ينوي الترشح عن دائرتنا في انتخابات مجلس النواب القادمة…
اسمحلي أقولها بصوت عالٍ، وبلسان كل مواطن بسيط في الشارع:
مش كل من هب ودب يركب موجة الترشح!
ومش كل واحد معاه شوية فلوس، أو واصل، أو محسوب على جهات، يبقى مؤهل يبقى نائب عن شعب!
الكرسي مش جايزة… ولا بدلة شياكة… ده أمانة تقيلة، ومحاسبة قدّام ربنا قبل ما تكون قدّام الناس.
احنا تعبنا من التمثيل المسرحي وقت الانتخابات…
تعبنا من الوعود الكذابة… من اللي بيوزع ابتسامات وفلوس قبل ما يوصل الكرسي، وبعدها يقفل موبايله ويسيب الناس لوحدها في الزحمة، في المستشفى، في الشارع، في الطابور!
عاوز تترشح؟
يبقى لازم تتوافر فيك شروط الضمير – الخبرة – النزاهة – الحضور – الرؤية الواضحة – القدرة على المواجهة – والولاء الحقيقي للدائرة مش للمصالح.
✔️ مش طالبين نائب سوبر مان،
لكن عاوزينه راجل/سيدة بيفهم في هموم الناس، ويشيلها بجد، مش يعمل بيها شو انتخابي.
✔️ مش طالبين نائب يغني على كل ليلى،
عاوزينه يشتغل للبلد، مش لحزبه ولا للي جابه ولا للكرسي.
✔️ مش عاوزين نائب يقعد على قهوة ويفتخر بتاريخه أو يلوّح بأسماء عيلته…
إحنا عاوزين واحد يتعب، يراجع، يراقب، يشرّف، ويدافع عن الناس بحق.
🔴 عارفين إن فيه ناس نضيفة ومحترمة ناوية تترشح… وبنقولهم: شدوا حيلكم، واشتغلوا على الأرض، والناس هتدعم الصح.
لكن اللي داخل يشتري الناس بالفلوس أو العصبيات، نقول له: الدائرة مش للبيع… والناس فاقت.
نطالب بأسماء تُشرف، شخصيات قوية عندها رصيد شعبي حقيقي، مش رصيد بنكي بس!
📢 الرسالة واضحة:
الكرسي مش منصب… الكرسي مسؤولية. واللي مش قدّها… ما يقرّبش منها.
